د کانونو او پټرولیم وزارت سرپرست د میتال مایننګ شرکت له استازي سره وکتل

د افغانستان د اسلامي امارت د کانونو او پټرولیم وزارت سرپرست شیخ الحدیث شهاب الدین دلاور د یکشنبې په ورځ 15/3/1401 نیټې د  میتال مایننګ شرکت له استازي او ورسره مل پلاوي سره په خپل دفتر کې وکتل.

په دغه کتنه کې د کانونو او پټرولیم وزارت سرپرست د ښه راغلاست ویلو تر څنګ یې د افغانستان په کانونو کې د پانګونې په اړه بحث او خبرې وکړې.

د  میتال مایننګ شرکت استازي او ورسره مل پلاوي د کانونو او پټرولیم وزارت له میلمه پالنې څخه مننه وکړه او د افغانستان په کانونو په ځانګړې توګه د کرومایټ په کانونو کې یې د پانګونې غوښتنه وکړه.

د کانونو او پټروليم وزارت سرپرست د افغانستان د کانونو په اړه معلومات وړاندې کړل او زیاته یې کړه: چې ټول کورني او بهرني شرکتونه کولاى شي د هېواد او کانونو له قانون سره سم د داوطلبۍ له لارې د افغانستان په کانونو کې پانګونه وکړي او همدراز یې وویل، چې په اوسنیو شرایطو کې خصوصا د امنیت له پلوه د افغانستان په کانونو کې د پانګونې لپاره بهرنیو پانګوالو جلبولو ښه فرصت دی.