د کانونو او پټرولیم وزارت سرپرست د چین هېواد د MCC Holoda کمپنۍ له ريیس سره وکتل
د کانونو او پټرولیم وزارت سرپرست شیخ الحدیث شهاب الدین دلاور د چین هېواد د دولتي شرکت MCCHoloda له رییس سره په داسې حال کې چې د مس عینک پروژې قراردادي شرکت مسوولینو هم ګډون درلود وکتل.
د MCC Holoda شرکت د چین د کانونو له لویو شرکتونو څخه دی چې د مسو، سرب او جستو د استخراج او پروسس په برخه کې فعالیت کوي د یادې کمپنۍ مسوولینو د افغانستان د لویو کانونو په ځانګړي ډول د مسو، سرب او جستو کانونو په برخه کې یې د پانګونې په موخه خپله لېوالتیا څرګنده کړه، د کانونو او پټرولیم وزارت څخه یې په دې برخه د همکارۍ غوښتنه وکړه.
د کانونو او پټرولیم وزارت سرپرست د هېواد دکانونو په برخه کې د پانګونې په موخه د دوی د لېوالتیا هرکلی وکړ او زیاته یې کړه، چې په بامیانو، کندهار او غور ولایتونو کې د سرب او جستو کانونه شته، په دې اساس که کمپنۍ د اسلامي امارت له شرایطو سره سم په افغانستان کې دننه پروسس ترسره کړي، موږ همکارۍ ته چمتو یو که نه نو بهر ته د خامو موادو صادرولو او پروسس کولو اجازه نه ورکول کېږي.
په پای کې د کانونو او پټرولیم وزارت سرپرست د مس عینک کان اړوندو موضوعاتو په اړه د یادې کمپنۍ له مسوولینو سره خبرې وکړې، د مس عینک کان د چارو د چټکتیا په موخه یې لازمې لارښوونې وکړې.
