د کانونو او پټرولیم وزارت سرپرست د MCC کمپنۍ له مرستیال سره وکتل
د کانونو او پټرولیم وزارت سرپرست شېخ الحدیث شهاب الدین دلاور نن دوشنبه 1402/3/22 نېټې د MCC کمپنۍ له مرستیال سره په خپل کاري دفتر کې وکتل.
په دې کتنه کې د MCC کمپنۍ مرستیال د عینک د مسو کان د کار پیل په اړه خپل پلانونه، طرحې او همدارنګه د سرک جوړولو، د لرغونو اثارو لېږد، د وسایلو او د ماشینونو راوړل او شته ستونزو په اړه بحث او نظرونه سره شریک کړل.
د کانونو او پټرلیم وزارت سرپرست په دې لیدنه کې وویل: وزارت د دې پروژې ټول مسؤولیتونه د قرارداد په اساس تر سره کړي او قراردادي شرکت نه باید د دغې پروژې عملي کار وځنډوي. او همدارنګه یې د عنیک مسو کان لرغونو اثارو د لېږد لپاره د کانونو او پټرولیم، اطلاعاتو او کلتور وزارتونو او د یادې کمپنۍ د استازو او د دغه وزارت د تخنیکي مرستیال په مشرۍ ګډه کمېټه جوړه کړه.
له دې خبرو وروسته د MCC کمپنۍ مرستیال وویل: چې د عینک ساحې څخه د لرغونو اثارو له لېږد وروسته به د یادې پروژې کارونه پیل شي. او همدارنګه د هغې سیمې درې سوه کورنیو ته چې هلته استوګن دي د مرستې ژمنه وکړه.
