د کانونو او پټرولیم وزارت سرپرست د MJAM شرکت له معاون سره وکتل.
د کانونو او پټرولیم وزارت سرپرست شیخ الحدیث شهاب الدین دلاور نن یکشنبه د 26/4/1401 نېټې د جیولوحي سروې معین او د مس عینک پروژې رئیس په شتون کې په خپل کاري دفتر کې ورسره وکتل.
په دغه کتنه کې د مس عینک د پروژې په برخه کې د وروستیو پرمختګونو، تخنیکي، مالي، د ځمکې استملاک او د لرغونو اثارو د انتقال په اړه خبرې اترې وشوې.
د کانونو او پټرولیم وزارت سرپرست وویل: زموږ اساسي هدف د کانونو په سکتور کې د تحرک رامنځته کول دي، په ځانګړې توګه د مس عینک د پروژې د ستونزو حل زموږ له لومړیتوبونو څخه دی، همدارنګه یې زیاته کړه چې د افغانستان اسلامي امارت ژمن دی چې یادې پروژې پلي کولو ته زمینه برابره کړي او ژر تر ژره یې ګټې اخیستنې ته وسپاري تر څو عملي کار پرې پېل شي او د خلکو لپاره به د کار زمینه هم برابره شي چې د دواړو هیوادونو په ګټه دی.
