د کانونو او پټرولیم وزارت سرپرست له روسي پانګوال سره وکتل
د کانونو او پټرولیم وزارت سرپرست شیخ الحدیث شهاب الدین دلاور، د پلان او پالیسۍ مرستیال شیخ ضیاءالرحمن الاریوبي او یو شمېر رئیسانو په شتون کې په خپل کاري دفتر کې له روسي پانګوالو سره وکتل.
روسي پانګوالو په افغانستان کې د پانګونې فرصتونه مناسب وګڼل او د هېواد د کانونو په ځانګړې توګه د بلخاب د مسو په برخه کې یې د پانګونې په موخه د دغه وزارت د همکارۍ غوښتنه وکړه.
د کانونو او پټرولیم وزارت سرپرست ورته د ښه راغلاست تر څنګ وویل: د افغانستان اسلامي امارت د بهرنیو پانګوالو د جلب او جذب لپاره سرتاسري امنیت، مناسب چاپېریال او اسانتیاوې برابرې کړي دي او کولای شي د افغانستان په کاني زېرمو کې د پانګونې په موخه خپل پروپوزلونه د شرطنامې مطابق وړاندې کړي.
