د افغانستان د کانونو او صنعت د خونې له غړو سره دویمه مشورتي ناسته ترسره شوه
د کانونو او پټرولیم وزارت او د افغانستان د کانونو او صنعت د خونې د غړو ترمنځ د هېواد د استخراجي صنایعو په سکتور کې د شته ستونزو د هوارولو او له فرصتونو څخه د اغېزناکې استفادې په موخه دویمه مشورتي ناسته ترسره شوه.
ددغې ناستې په لړ کې د پانګوالو پر وړاندې د شته خنډونو، ستونزو او ننګونو او د افغانستان د استخراجي صنایعو په سکتور کې د شته فرصتونو په اړه هراړخیز بحث وشو.
د کانونو او پټرولیم وزارت سرپرست محمد هارون چخانسوري وویل: د استخراجي صنایعو په سکتور کې د پانګوالو پر وړاندې د شته ستونزو، خنډونو او ننګونو د حل لپاره باید په هر کلسټر کې موجودې ستونزې او وړاندیزونه په منظم ډول لیست او په راتلونکې غونډه کې مطرح شي.
هغه زیاته کړه: د هېواد د اقتصادي ودې او په سکتور کې د شفافیت او تحرک ایجادولو په موخه به د ټولو استخراج شویو کانونو لپاره قانوني لارې چارې وسنجوو.
