د انګستان او جرمني هیوادونو له پانګوالو سره د کانونو او پټرولیم وزارت سرپرست لیدنه.

د کانونو او پټرولیم وزارت سرپرست ښاغلي شیخ الحدیث شهاب الدین دلاور نن سه شنبه 25/11/1401 نېټې د مرستیالانو او یو شمېر رئیسانو  په شتون کې د انګستان پارګان ستون (PARAGON STONES) او د جرمني پاورمټ شرکتونو له رئیسانو سره په خپل کاري دفتر کې ولیدل.
په دغه لیدنه کې د يادو شرکتونو رئیسانو د افغانستان په کانونو کې د پانګونې لپاره خپله لېوالتيا څرګنده کړه او په دې برخه کې يې د یاد وزارت له رهبري څخه د همکارۍ غوښتنه وکړه.
د کانونو او پټرولیم وزارت سرپرست له دوی څخه د افغانستان په کانونو کې د پانګونې له لېوالتیا څرګندونې مننه وکړه او له یادو شرکتونو څخه یې د خپلو پلانونو او پروپوزلونو وړاندې کولو غوښتنې ترڅنګ د همکارۍ ژمنه وکړه.