د کانونو او پټرولیم وزارت سرپرست د ترکیې هېواد امي اوغلو مرمر کمپنۍ له رئیس سره ولیدل
د کانونو او پټرولیم وزارت سرپرست شیخ الحدیث شهاب الدین دلاور د ترکیې هېواد امي اوغلو مرمر کمپنۍ له رئيس ښاغلي رجب مصطفی او د انادولو علماوو له رئیس شیخ عمر فاروق سره په خپل کاري دفترکې ولیدل.
د کانونو او پټرولیم وزارت سرپرست د ترکیې او افغانستان په ګډو دیني مشترکاتو په اړه خبرې وکړې زیاته یې کړه: افغانستان د کاني زېرمو له پلوه یو بډایه هېواد دی، په ټول هېواد کې ډاډمن امنیت دی، بهرني سوداګر کولای شي چې دافغانستان د کاني زېرمو په برخه کې پانګونه وکړي، په ځانګړې توګه د مرمر، رخام ډبرو په اړه چې په کندهار او هرات ولایتونو کې شتون لري د پانګونې خبره وکړه.
همدا راز د یادې کمپنۍ رئیس د افغانستان او ترکیې د مشابه کانونو په اړه خبرې وکړې ویې وویل: زموږ کمپنۍ د 40 کلونو راهیسې په ترکیه کې د کان کیندنې په برخه کې کار کوي، موږ د رخام او مرمر کانونو په برخه کې چې دافغانستان په هرات او کندهار ولایتونو کې شتون لري پانګونې ته چمتو یو.
په پای کې د کانونو او پټرولیم وزارت سرپرست د هغوی له لېوالتیا څخه چې د مرمراو رخام کانونو په برخه کې درلوده مننه وکړه، د پانګونې لپاره د زمینې برابرولو په موخه یې ورسره د همکاریو ژمنه وکړه.
