د کانونو او پټرولیم وزارت سرپرست د اوبو او برېښنا وزارت له پخواني سلاکار سره ولیدل
د کانونو او پټرولیم وزارت سرپرست شیخ الحدیث شهاب الدین دلاور د اوبو او برېښنا وزارت له پخواني سلاکار ښاغلي انجنیر محمد قسیم نعیمي سره په خپل کاري دفتر کې ولیدل، د کاني زېرمو او د هېواد د اوبو پر کنټرول یې بحث او نظرونه شریک کړل.
ښاغلي انجنیر محمد قسیم نعیمي د مس عینک کان لپاره د کاپیسا ولایت د صیادو له اوبو څخه د برېښنا بند د جوړوېدو چې تر 200 میګاواټ پورې د برېښنا ظرفیت لري یادونه وکړه او همدا راز یې د سروبي د اوبو په اړه چې د 180 میګاواټو برېښنا تولید وړتیا لري، همدارنګه د اوبو د بندونو د جوړېدو ترڅنګ یې د قوشتېپې، شاتوت بند، د لوګر دریا او تر ځمکې لاندې اوبو په اړه یې نظریات د وزارت له مقام سره شریک کړل.
د کانونو او پټرولیم وزارت سرپرست هغه ته ډاډ ورکړ، چې دیادې طرحې د عملي کېدو په موخه به د اوبو او برېښنا وزارت سره په همغږۍ خپلو هڅو او همکارۍ دوام ورکړي.
