د کانونو او پټرولیم وزیر د جبلالسراج د سمنټو د دویمې کارخونې د پرانیستې په مراسمو کې ګډون وکړ
د کانونو او پټرولیم وزیر الحاج ملا هدایت الله بدري د ١٤٠٥ لمریز کال د چنګاښ میاشتې په ١٨مه نېټه د جبلالسراج د سمنټو د دویمې کارخونې د پرانیستې په مراسمو کې ګډون وکړ.
په همدې مناسبت د جبل السراج ارګ ماڼۍ کې په جوړه شوې غونډه کې د ریاست الوزراء اقتصادي مرستیال ښاغلي ملا عبدالغني برادر اخوند، د ریاست الوزراء اداري مرستیال ښاغلي مولوي عبدالسلام حنفي، د کانونو او پټرولیم وزیر الحاج ملا هدایت الله بدري، د پروان والي، د ملي پراختیا شرکت رئیس، سیمه ییزو مسوولینو، قومي مشرانو او ملي پانګوالو ګډون کړی و.
د کانونو او پټرولیم وزیر ګډونوالو ته د خپلې وینا پر مهال وویل، سمنټ د هېواد په آبادۍ او رغونه کې مهم رول لري او د الله تعالی په فضل افغانستان د سمنټو د خامو موادو پراخې او کافي زېرمې لري.
ښاغلي بدري زیاته کړه، موږ ویاړو چې د دې ډول سترو صنعتي پروژو د پرانیستې شاهدان یو، د کانونو او پټرولیم وزارت د سمنټو شپږ تړونونه لاسلیک کړي او د کندوز د سمنټو پروژې تړون هم د پانګونې په موخه اعلان سپارلی ده.
نوموړي وویل: د کانونو او پټرولیم وزارت د هېواد د ابادۍ او اقتصادي ځانبسیاینې په موخه، د سمنټو ترڅنګ د اوسپنې د کانونو ګڼ قراردادونه هم کړي او هڅه کوي چې د کانونو له طبیعي شتمنیو څخه د صنعت، کاري فرصتونو او اقتصادي ودې لپاره اغېزمنه ګټه واخلي ترڅو هېواد د صنعتي تولیداتو په برخه کې پر ځان بسیا شي.
