د کانونو او پټرولیم وزیر د فاین سټار ګروپ او ازره ګرین سټون شرکتونو سره تفاهم لیک لاسلیک کړ
د کانونو او پټرولیم وزیر الحاج ملا هدایتالله بدري د چهارشنبې په ورځ د ۱۴۰۵ لمریز کال د تلې میاشتې په ۸مه نېټه، د فاین سټار ګروپ او ازره ګرین سټون د استخراج او پروسس شرکتونو له استازو سره د سربو او جستو د معیاري پروسس د کارخونې د انتقال او نصب په برخه کې د پانګونې په موخه تفاهم لیک لاسلیک کړ.
د کانونو او پټرولیم وزیر د یاد تفاهم لیک د لاسلیک پر مهال وویل، د کانونو او پټرولیم وزارت چمتو دی چې د کانونو د استخراج او پروسس او همدارنګه د اړوندو کارخونو د جوړولو په برخه کې ټولو پانګوالو ته لازمې اسانتیاوې برابرې کړي.
نوموړي زیاته کړه، د کانونو او پټرولیم وزارت د هېواد د کانونو د پروسس او په دې برخه کې د پانګونې د پراختیا لپاره د خصوصي برخې ملاتړ کوي.
د یادو شرکتونو استازو هم په خپل وار د تفاهم لیک له مخې د شويو ژمنو د عملي کولو په برخه کې خپل ډاډ څرګند کړ.
