د کانونو او پټرولیم وزارت سرپرست د ایران هېواد له سفیر سره ولیدل
د کانونو او پټرولیم وزارت سرپرست شیخ الحدیث شهاب الدین دلاور د ایران اسلامي جمهوریت له سفیر ښاغلي حسن کاظمي قمي او مل پلاوي سره په خپل کاري دفتر کې ولیدل.
د کانونو او پټرولیم وزارت سرپرست مېلمنو ته د ښه راغلاست تر څنګ د د واړو هېوادونو ترمنځ د ښه ګاونډیتوب او اړیکو پر ښه والي، د دوو کلونو په موده کې د اسلامي امارت په ځانګړې توګه د وزارت پر فعالیتونو او لاسته را وړنو، د هرات ولایت د غوریانو د اوسپنې د څلورو بلاکونو، د بد خشان راغستان او کندز سروزرو کانونو، د هرات ولایت د نفتو ګازو بلاکونو چې اوس مهال د داوطلبۍ لپاره اعلان ته سپارل شوي دي په اړه یې خبرې وکړې.
د ایران اسلامي جمهوریت سفیر د وزارت له مشرتابه څخه مننه وکړه او همدا راز یې د افغان محصلینو چې په بېلابېلو پوهنځیو کې په ځانګړې ډول د اکتشاف، د کانونو د استخراج او پروسس په برخه کې په ایران هېواد کې په زده کړو بوخت دي په اړه یې خبرې وکړې، د بېلا بېلو برخو ترڅنګ یې د کانونو په برخه کې د هر ډول همکاریو د چمتو والي خبره وکړه.
په پای کې د کانونو او پټرولیم وزارت سر پرست وویل: ټول هغه افغانان چې له هېواد څخه بهر په زده کړو بوخت دي زموږ ملي سرمایه ده، هېواد هغوی ته اړتیا لري او ډاډه یم چې د زده کړو له بشپړېدو څخه وروسته به د هېواد اقتصادي پراختیا او پرمختګ لپاره بېرته هېواد ته راستانه شي.
