د کانونو د ولایتي رئیسانو لپاره د روزنیز پروګرام پرانیسته
د کانونو او پټرولیم وزارت سرپرست شیخ الحدیث شهاب الدین دلاور د شنبې په ورځ د 23/2/1402 نېټې د تخنیکي مرستیال انجنیر وحیدالله حلیمي او د مالي او اداري مرستیال مولوي حسام الدین صابري په شتون کې د جیولوجي سروې موزیم په تالار کې د کانونو ولایتي رئیسانو لپاره شپږ ورځینی روزنیز پروګرام پرانیست.
د کانونو او پټرولیم وزارت سرپرست د دغه پروګرام د پرانېستې په مراسمو کې د کانونو او پټرولیم وزارت د تېر کال د دندو، فعالیتونو او لاسته راوړنو په ترڅ کې وویل: د کانونو او پټرولیم وزارت ټول رئیسانو او مسؤولینو هغه که د مرکز وي یا د ولایتونو مسؤولیت لري چې خپلې چارې او فعالیتونه په سمه او ایماندارۍ سره تر سره کړي او د خپلو خلکو او هیواد د خدمت سرچینه شي.
د يادونې وړ ده چې دغه پروګرام به د شپږ ورځو لپاره د کانونو د نويو ساحو د سروې، د قراردادونو د تر سره کولو، د کانونو د قراردادونو د پروسې د څارنې او ارزونې او د کانونو د ولايتونو رئیسانو لپاره د عوايدو راټولولو په برخه کې د ظرفيت لوړولو په موخه دوام وکړي.
