الحاج مولوي محمد عيسی اخند د ټاپي پروژې په تړاو د ترکمنستان له استازو سره وکتل

د کانونو او پټرولیم وزارت تخنیکي مرستیال الحاج مولوي محمد عیسي اخند نن 9/11/1400 نېټه په خپل کاري دفتر کې د ترکمنستان هیواد له استازو ښاغلي عاشیر قربان نیازوف، دولت نیازوبردی اوف او جیحون بزګانوف پیروامون سره د ټاپي پروژې د کار د پېل په اړه خبرې وکړې.

په دې کتنه کې د ترکمنستان استازو د ټاپي پروژې په اړه کافي معلومات وړاندې کړل او وویل، چې د افغانستان له لارې د ګازو د نل لیکې د غځولو کار باید ژر تر ژره پیل شي او افغان حکومت باید د دغې پروژې د تطبیق لپاره جدي اقدام وکړي.

ښاغلي عاشير قربان نیازوف وویل که دا پروژه عملي شي افغانستان به تر شپږ میلیارد ډالرو زیات ټرانزیټي عواید ترلاسه کړي.

هغه زیاته کړه، موږ به د نړیوال بانک او د آسیا پراختیايي بانک د پاملرنې او همکارۍ د جلبولو په موخه په هرات کې د پروژې لومړی فاز فعال کړو او د کار له پیل مخکې یې د ترکمنستان او افغانستان ترمنځ د تفاهم لیک د لاسلیکولو غوښتنه وکړه.

د وزارت تخنیکي مرستیال الحاج محمد عیسی آخند د پروژې په پیل کې د هر ډول همکارۍ ژمنه وکړه او د تخنیکي او اداري ستونزو د حل لپاره یې د یوه ګډ کمیسیون د جوړولو او د تفاهم لیک د لاسلیک غوښتنه وکړه.

هغه په یاده غونډه کې وويل: ما ٢٢ کاله وړاندې د ټاپي پروژې د پيل لپاره ترکمنستان ته سفر کړی و او تر اوسه مې په دې  8 مياشتو کې د ټاپي پروژې د پيل لپاره له 6 څخه زياتې لیدنې کړې دي. او هغه ستونزې او خنډونه چې د ټاپي پروژې په لاره کې پراته دي د حل لپاره به یې عملي ګامونه پورته کړو.

نوموړي دا هم وویل چې تېر حکومت کوم تړون کړی موږ ته د منلو وړ دی او ملاتړ یې نه کوو. تخنیکي مرستیال د ترکمنستان استازو ته وړاندیز وکړ چې د ټاپي پروژې لپاره دې له هغو متخصصینو، کارګران او ماشینونو څخه چې په افغانستان کې موجود دی ترې استفاده وشي، هغه زیاته کړه چې د پروژې لپاره هر ډول اړین تجهیزاتو ته ضرورت وي باید په افغانستان کې وپېرل شي.