په هرات ولایت کې د استخراجي برنامو او فعالیتونو هراړخیزه ارزونه وشوه
د کانونو او پټرولیم وزارت د پالیسۍ او استخراجي برنامو معین محمد عتیق ذکي، هرات ولایت ته د خپل سفر په لړ کې، د دغه ولایت د استخراجي برنامو هراړخیزه ارزونه وکړه او د خصوصي سکتور له استازو سره یې د جلا کتنو په لړ کې د دوی ستونزې او وړاندیزونه واورېدل.
د پالیسۍ او استخراجي برنامو معین د هرات ولایت د کانونو او پټرولیم وزارت له ولایتي واحد سره په جلا کتنه کې د دوی ستونزې وارزولې او په چارو کې د لا بهبود په موخه یې دوی ته لازمې سپارښتنې وکړې. سربېره پردې یې، د افغانستان د روڼتیا نوښت سازمان په غونډه کې هم ګډون او وینا وکړه.
محمد عتیق ذکي، د خپل سفر په لړ کې، د هرات د سوداګرۍ او پانګونې د خونې له رئیس او غړو، د صنعت او کانونو د خونې له رئیس او غړو، د ښځو د سوداګرۍ خونې له رئیس او غړو او د خصوصي سکتور له استازو سره هم وکتل او د دوی ستونزې او وړاندیزونه یې واورېدل. په دې غونډه کې، د پانګونې لپاره د شته فرصتونو او د اسانتیاو د ایجادولو په اړه هم هراړخیز بحث وشو.
د کانونو او پټرولیم وزارت د پالیسۍ او استخراجي برنامو معین د خپل سفر په وروستۍ ورځ، د مرمر د ډبرو د فابریکو په شمول، د استخراجي صنایعو د سکتور له نورو صنعتي فابریکو څخه هم لیدنه وکړه.
