د جبل السراج سمنټو آفرګشایي غونډه ترسره شوه
د جبل السراج سمنټو آفرګشايي غونډه د کانونو او پټرولیم وزارت سرپرست شیخ الحدیث شهاب الدین دلاور په مشرۍ د مالي او اداري مرستیال مولوي حسام الدین صابري، یو شمېر رئیسانو او داوطلب شرکتونو استازو په شتون کې نن یکشنبه د 11/4/1402 نېټې تر سره شوه.
د کانونو او پټرولیم وزارت سرپرست مېلمنو ته د ښه راغلاست تر څنګه د یادې پروژې د استخراج او پروسس د پرختیا په اړه ګډونوالو ته معلومات وړاندې کړل.
په دغه غونډه کې ټاکل شوې کمېټې د آفرګشايي څخه وروسته د داوطلب شرکتونو د پروپوزلونو او اسنادو د ارزونې په اړه د خپل کار د پېلېدو خبره وکړه.
د يادونې وړ ده چې دغه پروژه د څه باندې 200 ميليونه امريکايي ډالرو په پانګونې سره چې په ورځني ډول به د 6000 ټنو سمنټو د توليد ظرفيت ولري او زرګونه کسانو ته په مستقيم او غير مستقيم ډول د کار زمينه برابرېږي.
